|
حهمهی
ئهحمهد
ڕهسوڵ
رەمەزان مانگێکە موسڵمانان پراکتیکى تەواوەتى و سەرتاسەرى فەرزەکان و
سوننەتەکان و ئەرکەکانى خۆیان بەرامبەر خوداى کردگار و میهرەبان
جێبەجێدەکەن. حیکمەتێکى گەورەى تێدایە کە مرۆڤ دانبەخۆیدا بگرێت و لە
سپێدەوە تا زەردەپەڕو ئێوارە نە نان بخوات نەئاو بخواتەوە و نەهیچ
کردارێکى ناشرین و نەخراپەکارى بکات! بەکورتى حیکمەت و پەندى گەورەى
رەمەزان لەوەدایە مرۆڤى خواناس و باوەڕدار، واز لەشەهوانییەتە غەریزییە
بێشوومارەکانى زاتى خۆى بێنێ، لەپێستى خراپە و بەدکارى مرۆڤێکى بەد
بچێتە دەرەوە و پۆشاکى فریشتەیەکى پاک و چاک بپۆشێت، ببێتە مرۆڤێکى
تەواو و کامڵ، خاڵى بێت لە درۆ و دزى و گزى و فزى و دڵپیسی و داوێن
پیسی و کوشت و کوشتار!! رەمەزان لابورێکى سی (30) ژوورییە و مرۆڤى
گوناهبار پیایدا تێپەڕدەبێ، ياخود بە ئاوێکى پاک خۆى بسمیل دەکات و خۆى
لەگوناه و لە خراپەکارى پاک دەکاتەوە، جارێکى دیکە پەیمان بەخۆى و بە
یەزدان دەداتەوە کە ئیدى مرۆڤێک بێت، رێز لەمرۆڤى بەرامبەرى خۆى بگرێت،
یەکسانى و برایەتى پیادە بکات و ئیدامە بەژیانێکى پڕلەقەناعەت و
موحیبەت و رێز و ئاسوودەیی و هێمنى بدات، چ باشی و چاکەیەکى بۆ خۆى و
خێزانەکەى دەخوازێت، بۆ هاوسێ و بۆ هاوڵاتى و هاونیشتمانییەکەى خۆشی
داخوازبێت و رۆژانە بە کردار و بە هەڵوێست نوومایشی بکات!
رەمەزان بۆ ئەو هۆکارە ئافەریدە و فەراهەمکراوە، کە ئیدى تاکەکانى نێو
کۆمەڵگا (بەتایبەت دەوڵەمەند و خوا پێداوەکان) پێویستە بیر لەهەژاران و
نەداران بکەنەوە، پێویستە چێژى ئازار و ئەشکەنجەى برسێتى و تینووێتى
مرۆڤە هەژار و برسییەکان بەکردارەکى هەست پێبکەن و لەرووى ماددى و
مەعنەوییەوە دەستى هاریکارییان بۆ درێژ بکەن و بە براى هاوتاى خۆیانیان
بزانن. لەلایەکى دیکەشەوە، پێویستە لە مانگى رەمەزاندا کار و کاسبی
بەوپەڕى ویژدان و دادپەروەرى و مرۆڤدۆستانەوە بەڕێوە ببرێت، پێویستە
تەرازووەکان لەراستى و لەهەقەوە نزیک بن، کەس گزى و فزى و دزى لە براى
هاووڵاتى و هاوشاریی خۆى نەکات، کەس سوێندى درۆ و تەڵاقی سێبەسێ لەسەر
سەلکە پیازێک یان سێ چڵ کەرەوس نەخوات، کەس چاوى برسی و زەقی
ئەهریمەنانەى خۆى نەبڕێتە نامووس و حەرەمى ماڵى هاوسێ و هاوکارى خۆى،
کەس چاڵ بۆ برا و خۆشکى خۆى هەڵنەکەنێت!
ئەمانە و گەلێکى دیکە نییەت و حیکمەتى راستەقینەى مانگى رەمەزان
دەگەیەنن و پێویست وابوو ئیدى لەکۆمەڵگا ئیسلامییەکاندا لە دواى
رەمەزانیش، دۆخى چاکەخوازى و خێرخوازى و مرۆڤدۆستى لەبرەودا بووایە.
پێویست وابوو یەکسانى و برایەتى و ئازادى و ئاسوودەیی و دادپەروەرى و
سەروەریی یاسا لەوپەڕى سەرفرازى و بەرکەماڵیدا بووایە. پێویست بوو لە
هەر گەڕەکێکدا (حاتەم تەى) یان پیاوى چاکە خواز و بەخشندەى لەشێوەى
(کەریمى عەلەکە و عەلى کەمال و رۆبن هوود و سەعالیک) و چەندەها پیاوى
مەزنى بەخشندە و فریادڕەس و خێرخوا، دیوەخانى گەورە و مزگەوتەکان و
کڵێساکان (لەشێوەى کاریتاس /کەخێرخواز و بەخشندەن لەئەوروپا) بۆ هەژار
و بۆ رەش وڕووت و برسییەکان بخەنە سەر گازى پشت و دەرگاکانیان واڵا
بکردایەتەوە، هەر هیچ نەبێت لەمانگى رەمەزاندا، بەو کار و کردەوە چاکە
هەڵبسانایە و دیاردەى برسێتى و بێکارى و هەژارى کە رادە و رێژەیان زیاد
لەهەموو ساڵێک ،ئەمساڵ لەوپەڕیدایە و دیاردەى هەژاریی ژێر هێڵی هەژارى
لە کوردستانەکەماندا سەریانهەڵداوە و وەدەرکەوتوون!
بەڵام بەداخەوە ئەوەى لەکوردستانى ئازاد و زەنگیندا دەیبینین، جێی
ئومێدبەخشین و گەشبینى نییە، لەهیچ گەڕەکێکدا مزگەوتێک یان دیوەخانێک
یان ماڵێک یاخود دوکانێک بەدیناکەیت، کە هیچ کام لەم دەوڵەمەندە
ملیۆنێر و ملیاردێرانەمان یان هیچ کام لەم بەرپرس و مەسئولانەى خۆمان
کە شەق لە ملیۆن دینار دەدەن، تاقە یەک هەژار تێر ناکەن و تاقە یەک
پەرداخ "لەم وشکە ساڵییە قاتو قڕییە ى كوردستاندا" بەسەر هیچ
تینووییەکدا نابەخشنەوە! کەواتە مانگى رەمەزانیش ناتوانێت و نةيتوانى
هیچ رۆڵێکى ئەوتۆ بگێڕێت و دەوڵەمەند و بەرپرسە ملیاردێرەکانمان
هانبدات، مرۆڤدۆست و بەخشندەبن، بیریان لاى مرۆڤى برسی و هەژار و
تینووبێت، بەزەییان بە منداڵ و ژن و پیرى بێنەو و فڕێدراو و
پەراوێزکراوى سەرشەقام و کۆڵانەکانى ئەم کوردستانە هەتیوەدا بێتەوە،
کەواتە بۆ هەموومان ئاشکرابوو کە هیچ باوەڕ و خوداپەرستى و ئایین و
ویژدان و مۆڕاڵێکی بەرز و جوان، یان هیچ شێوە فەلسەفە و رێبازێکى
مرۆڤدۆستى و ئینسانى و کوردایەتى لەویژدان و لەمێشک و لەدەروونى ئەم
بەرپرس و دەوڵەمەندە کوردانەدا نەماوە. بۆ پاسادانى راستى ئەم قسەیەش
فەرموو لەبەرنامەکانى تەلەفزیۆن و کەناڵە ئاسمانییەکان بڕوانن کەتەنها
پێشبڕکێ و قومارخانەن بۆ بردنەوە و دۆڕاندنى خەڵکى، هاندانى تاکى کورد
بوو كە ببنە قومارچی و تەنها (هامەر و دۆلار) یان لە بیربێت و بەو
مانگى رەمەزانە برە و بە قومارکردن بدرێت و پیاوانى ئایینى ژێرسێبەرى
دەسەڵاتیش، پارووى چەور لە بەردەم سپلیتدا لووش دەدە! تاقە یەک
بەرنامەى شەرمن هەبوو کە
بەربانگ لەگەڵ هەژارانى ژێر هێڵى سفرى هەژاریدا بکات و بڕى پارەى
بەخشراویش زۆر کەم بوو
لە جێگەى نەبووان بوو! کە ئةوةش مایەى شەرمەزارییە بۆ مرۆڤدۆستى!
چەند ساڵێکە، هەر کە مانگى رەمەزان دێتە پێشێ ئیدى نرخى شتوومەک و
خۆراک و کاڵا لەبازاڕدا ئاگردەکەنەوە و دووقات گرانيدەکەن و حکومەتیش
وەکو نەعامە، سەرى لەنێو خۆڵ و قووڕى بۆگەنى کوردستاندا وندەکات و
کۆنترۆڵەکان و غەرامە و بەرپرسیارێتى خۆى و سزادانى سەرپێچی کاران
دەخاتەوە نێو قاسە زێڕین و دیگیتاڵەکانى خۆى و نقەى بۆ ناکات !
لە رەمەزاندا نەتاکى کوردى فرۆشیار و نه کاسب، نە دەوڵەمەند و نە
مەسئول و بەرپرس و نە پیاوانى ئایینى کورد و نە مزگەوتەکان و نە
کڵێساکان هیچیان ئەوەندەى خوالێخۆشبوو (کەریمى عەلەکە)ى سلێمانى (کە
فەلە و کریستیان بووە) بەخشندەنین و ناتوانن پەرداخێک ئاو بکەن بەدەمى
تینووییەکەوە! چونکە هەموومان پێکەوە پەیمانمان داوە پارە و دۆلار
دۆستبین نەک مرۆڤدۆست!
نەکەسمان روومان لەخوایە و نەکەسمان بڕوادار و باوەڕ پتەوین ...!
hemea.rasoel961@yahoo.com
|