مێژووی ئێمە

زەردین ئێمە

پێش ئەوەی پاییزان دابێ

سپیین و

كفناوی و

بەفرین

با پردی سێ وەرزی تریش

ماوەی تا جستانی مابێ

لە ڕۆژ هەڵاتی تیاچوونا

شیرین خامۆشێكی شۆخین

دەریای بیرمان

شڵپە ڕێژ و

بە سەوڵی تاسەشمانەوە

نغرۆی عیرفانێكی تۆخین

داڵغەمان

كاوێژی كۆنە

ئیشراقمان لە داگیرسانە

مێژوومان بۆتە ئوستووره و

سەری بە هەزارەكانەوە

ڕابردوومان لە ئەفسانە

لە ڕەزبەری هەزار حەزا

خەیاڵ ڕێزانی بوونمانە

حەزوەری ئارەزوومانە

شەرماوەزی ڕووداوی ژین

سەیرانباری عەشق و تاسە

جێبەندانی یەك هەناسە

پاییز هەبێ و نەبێ زەردین

بەفرینی پێش جستان هاتن

زیز و وەڕەز و وەرزاوین

خۆمان و

خەون و

مێژوومان

ئەفسووس!

ئەفسانە لێدراوین

گیانم

مەلێكی سووك ڕۆحی

بنارێكی ئاربەبا بوو

سەوز وەك حەز

سپی و بەفرین

گەش گەش چەشنی ئەشقاوەكەی

سەرچاوەی ئاوی بانە كۆن

چ ڕازێكی پۆپەشمینی پیرۆزەیی

ساماڵی ئەم

ئاسمانی خۆرنشینەمی

لێ گۆڕیوم

گیانم ئاوقا بە كامە كامەرانی بوو

كە ڕەونەقی پەشیمانی و

تاوانی پێوە نیشتووە

بۆ وا سیس و دامردووە

ئەم داڵغە شێعراویە شینە

بە هەناسەی كام هەڵەبجە

تووشی گولی و

ئاڵۆشی ئەم یادە تاڵەن

چۆن كفناوی چوار وەرز پێش

ئەم جستانە توونە زاڵەن

ئەم شێعرانە كاڵ و خاوی

كام مۆسیقا وەهماویەن

پەلكە زێڕینەی بەرزەینی

كام گیانە باراویەن

ئەی مێردەزمەی دزێوی زیت

لە ڕەزبەری هەزار حەزا

هەست ڕێزانە

سەردەمی مۆتەكەی دەرگا و

دەلاقەی خەونە سەوزەی ناو

خەونە بەردەوامەكانە

جەرگەی قڕگە و

پاییزان و

سروود و شێعر قڕانە!

 

سۆران حسێنی