نووسینی: محمد جەواد خردمند و: ئازاد بەهین

 

سەرباز سەری تفەنگ و قۆنداغی تفەنگەکەی لە دەستیدا گرت، لە سەنگەر رۆیشتە دەرێ و خۆی فرێدایە ناو خاکڕێزەکەوە. بە یارمەتی هەنیشک و ئەژنۆکانی خۆی هەڵکێشایەوە سەرەوە. دەنگ و گرمە گرمی فڕۆکەکان لە دوورەوە ئاگری شەڕیان هەڵدایساند.. سەرباز گەڕایەوە، چاوی لە ئاگری ژێر فڕۆکەکان کرد و وتی: "خۆمانە." کە گەیشتە کۆتایی خاکڕیزەکە سەری بەرز کردەوە تا ئەو لایەی دیکەی خاکڕێزەکە ببینێ، بەڵام نیگای وتی سڵاو. ئەویش سڵاوی کرد. ترپەی دڵیان پێکەوە کۆمەڵێک قسەی نەوتراویان هەبوو و یەکتریان هەڵسەنگاند. هەر دووکیان تفەنگەکانیان لەسەر خاکڕێزەکە فڕێدا. دەنگی تۆپ و خومپارە لە پشت سەری نوورەکانەوە دەڕۆیشت. گفتوگۆ و دەنگە دەنگی ترپە دڵیان بە ئەستەم دەبیسترا.. سەرباز سەری بەرەو دووژمن وەرچەرخاند و وتی: "تۆ." دووژمن بە شوێن نیگاکەیدا رۆیشت. ترس لە پەنجەی پێیەکانیدا لە ناو پۆتینەکاندا سەرگەردان بوو.. سەرباز جوڵەیەکی کرد و وتی: "ئێمە دوژمنین". سەرباز کەوتەوە بیری موحسین هاوڕێی سەردەمی منداڵی کە بە تفەنگە دارییەکەی دەپەڕییە ناوەڕاست کۆڵان و دەیوت دەستتان بەرز کەنەوە، تۆ دوژمنی دەبێ بکوژرێی و بە دەنگی خۆی دەنگی موسەلسەلی دەردەهێنا. دواتر چاوێکی لەو تفەنگانە کرد کە لەسەر خاکڕێزەکەدا کەوتبوون. سەرباز وتی: "وەرە ئێرە، لەم خوارەوە سەنگەرێکی ئەمنی لێیە. با بڕۆین بۆ ئەوێ" سەرباز ئاماژەی بە تفەنگەکەی کرد کە هەروا لە سەر خاکڕێزەکە کەوتبوو. دووژمن تفەنگەکەی هەڵگرت کە خومپارەیەک سەنگەرەکەی پڕش و بڵاو کرد. ئەوان بەرەوڕووی یەک راکشان و پاڵیان دایەوە بە سەنگەری ژێر پێیان کە هێشتا دووکەڵی لێ هەڵدەستا. سەرباز پاکەتێک جگەرەی لە گیرفانی بڵووزەکەی دەرهێنا و وتی: "سیگار دەکێشی" دووژمن شەمچەیەکی داگیرساند و مژێکی قووڵی لە جگەرەکەدا و وتی: "تۆش بۆ نیشتمانەکەت شەڕ دەکەی؟" فڕۆکەیەک بە دەنگێکی زۆرەوە لەسەر سەریان تێپەڕی. سەرباز وتی: "خۆمانەیە." دووژمن وتی: "نا، دووژمنە" هێشتا قسەکانی کۆتایی پێ نەهاتبوو کە تیکەی خومپارەیەک دڵی سەربازی پێکا. جگەرە پان کراوەکان بۆنی خوێنی تا هەناوی دووژمن دەبرد. دووژمن ناوچاوانی سەربازی ماچ کرد، تفەنگەکەی هەڵگرت و بەرەو لای خاکڕیزەکەىتر رۆیشت. هاواری گریانی لە ناو دەنگ و گرمە گرمی فڕۆکەکانی خۆمانە و دووژمندا ون بوو.